Job 16

Job

1 Tua ciangin Job in dawng a:

2 “Hih bang thute tampi ka za khin hi;
na vek un a lunggim huai hehnemte hi lel uh teh! ^a
3 A mawkna-in na mutmutna kamte uh bei ngei lo ding hiam?
Hong nasak bang kammal tawh kei hong busimsim lai ding na hi uh hiam? ^b
4 Note kei dinmunah om le uhcin
kei zong no pau bangin ka pau thei ding hi;
note ka lu hong peisanin note langah
kam hoih nono ka pau thei mah ding hi.
5 Ahi hangin ka kam in note hong hanthawn thei ding hi;
ka muk panin hong hehnemin kong nuamtuamsak ding hi. ^c
6 “Pau taleng lah ka natna nuamtuam tuan lo a;
ki-iip taleng zong a damsiang tuan kei hi. ^d
7 Hi takpi hi, Pasian aw, kei nong patkhiasak a; ^e
ka innkuan bup nong gamsak hi. ^f
8 Kei nong hencip khin a - tua mah kei teci a suak hi;
ka gawn’na dingto-in kei langah teci a pang hi.
9 Pasian in kei hong doin, hehin kei hong balkham a, ^g
a ha hong gawisan hi; ^h
ka langpa in a mitin hong sal gemgam hi. ⁱ
10 Mite kamka-in kei hong zahnuihsan uh a; ^j
hong zahpihna-un ka paang hong bengin, ^k
kei langkhatah kipawl uh hi. ^l
11 Pasian in migilote tungah kei hong pia a,
a kheltatte kepcip dingin hong lawnkhia hi.
12 A nuamsa kimlai kei hong nuaizan a;
ka gawlah hong manin hong nencip hi. ^m
Muitum in hong nei a;
13 a thalkapte in kei hong umcih uh hi.
Hehpih peuhmah loin ka kalte sunlet uh a, ⁿ
leilakah ka sinkha luangkhia hi.
14 Amah in kei hong liamsuah kikkik a, ^o
galhangpa bangin kei hong ngongbawl hi. ^p
15 “Ka vuntungah puanhampi ka khui-a, ^q
ka taltang leivui lakah ka phum hi. ^r
16 Ka kahkahna-in ka mai san a,
ka mitkhu bawk in ka mit a liah hi; ^s
17 tua hi napi, ka khutte ngongtat lo a, ^t
ka thungetna a siangtho hi. ^u
18 “Leitang aw, ka sisan vukcip kei in; ^v
ka kikona kikhawlsak kei tapeuh hen! ^w
19 Tu nangawn in vantungah ka teci a om hi; ^x
ka tangdingpa a sangna ah om hi.
20 Kei hong thumsakpa ka lawm ^{▼▼16.20 Ahikeh ka lawmte in hong simmawh uh hi.} hi-a,
tua kawmkawmin Pasian tungah ka khitui ka sungkhia hi; ^z
21 Mi khat in a lawmpa ading a thumsak bangin
mi khat tangin amah in Pasian tungah a thumsak hi. ^aa
22 “A kileh kik nawn lo dingin
khual ka zin ma-in kum tawmkhat sung bek lah hong bei ding hi. ^ab